Иргэдийн нүдний эрүүл мэндийг дэмжих, урьдчилан сэргийлэх үзлэг оношилгооны хүртээмжийг нэмэгдүүлэх, олон улсын эмнэлгийн хамтын ажиллагааг өргөжүүлэх зорилгоор Бүгд найрамдах Солонгос улсын туршлагатай нүдний эмч нарын багийг Монгол Улсад урьж ажиллуулах арга хэмжээг “Бат-Амгалан” сангаас зохион байгуулж байна.
БНСУ-ын 16 эмч Монгол Улсад байх хугацаандаа 1000 гаруй иргэнд үнэ төлбөргүй нүдний үзлэг хийж, харааны хугарлын эмгэгийг эрт илрүүлэх, шаардлагатай тохиолдолд хараа засах нүдний шил болон хамгаалалтын нарны шилийг олгох юм. Энэхүү үйл ажиллагаа өнөөдрөөс /2026.07.20/ Баянзүрх дүүргийн "Жанжин клуб"-т үргэлжилж байна.
Үзлэгийн үйл ажиллагааг энэ сарын 20-22-ны өдрүүдэд зохион байгуулж, тус дүүргийн нийт 43 хороодоос сонгогдсон 1000 иргэнийг хамруулахаар төлөвлөж байна. Үзлэгийн үр дүнд харааны бэрхшээлийг эрт илрүүлэх, иргэдийн эрүүл мэндийн боловсролыг нэмэгдүүлэх, шаардлагатай тусламж үйлчилгээнд үнэ төлбөргүй чиглүүлэх ач холбогдолтой юм.
