ОХУ-ын ерөнхийлөгч В.Путин өнгөрсөн Лхагва гарагт Украинд байлдах хүчээ нэмэгдүүлэхээр бүх нийтийг хамарсан цэргийн дайчилгаа зарласан.
Энэхүү мэдэгдлийн дараа ОХУ-аас гадагш нисэх ихэнх нислэгийн тасалбар зарагдаж дууссан бөгөөд ОХУ-Монголын Хиагт боомт дээр утс улсаас манай улс руу орохыг хүссэн хүмүүсийн тоо эрс нэмэгдэж байгаа.
Хил Хамгаалах Ерөнхий газрын өгсөн мэдээллээр өнгөрсөн амралтын өдрүүдэд буюу 09.24, 09.25-ны өдрүүдэд Алтанбулаг боомтоор ОХУ-ын 1915 иргэн орж ирсэн байна. Тухайлбал, 2022.09.24-ны өдөр ОХУ-аас Монгол Улс руу 931 иргэн орж ирсэн бол 2022.09.25-н буюу өчигдрийн байдлаар тус улсаас манай улс руу 984 иргэн орж ирсэн байна. Мөн сүүлийн 10 хоногт тус боомтоор ОХУ-ын 5001 иргэн манай улсад орж ирсэн бол, 1707 иргэн гарсан байна.
Түүнчлэн 09.21-ны өдрийг хүртэл Алтанбулаг боомтын үйл ажиллагаа хэвийн буюу өдөрт дунджаар 200 гаруй ОХУ-ын иргэн манай улсад орж ирдэг байсан бол 09.22-ны өдрөөс энэ тоо нэмэгдэж байгаа гэдгийг албаныхан хэллээ.
