Ардын хувьсгалын 100, 101 жилийн ойн хурдан морьдын уралдааны даага насанд Улаанбаатар хотын Сүхбаатар дүүргийн харъяат уяач Э.Лутаагийн хээр даага баян ходоодоор тодорсон билээ. Уг даагыг А.Мөнх-Эрдэнэ хүү унаж хурдлуулсан юм.
Баян ходоодонд орсон даагыг
"Зээ, энэ хүлгийн эзэн нь
Эндүүрч ташаарч бодсноос
Уясан уяа багадаад
Унасан хүүхэд нь балчирдаад
Барьсан ташуур нь богинодоод
Үлий манхан тааралдаад
Үргэлж саатал тохиолдоод
Үсэрч гарсан боловч
Үхэр тэрэг шиг хоцорч
Энэ жилийн баян ходоод
Ирэх жилийн баярын магнай
Бат түмэн эх ээ" хэмээн ерөөж, байлдаг уламжлалтай юм.
